Aeng Mata Etem

salaggi` kortok mano` gi` padha nebbak
mata se nyomber taresna neko calkong. jigglem tadha` karena
paste, se bakal asat ban kerreng. naleka coma arendhune kakerrongan
se banget nyanggerra` songsang, epengkot ta` etale`e. tapangger saanga` koko bula tadha` parcajana. aeng mata neko paggun nyeram jaman.
ngoker bato bakto kalaban tongket Musa se bakal meyak sagarana rassa. se bakal mapesa galunthongan raga ban nyaba. ta` u-jau bula ngalamon, sorowan panyothok napso. sabab, salanjangnga tete paste badha daradda. saetem malem bakal kapanggang seyang birang. sasowep talengkongan andhang bakal elang e tenggangan tompang sorop ban li`-guli`na pajjar

(etonggang-etondhung, sajan daddi se ngalkal dhalem kobalan
se epengkot baringbing anganga, enga` dha` roba, sowara ban sepadda)

aeng mata neko, ngaros amowara sokma, daddi karang. aranca` daddi ona`. ona` daddi oca`. ancor daddi baliker. e gir sereng, apangeyas etem ngarak dalko` ekakan baung. baung, coba epancer jidal monggu dha` panyelladan sepat-sepat neko. dika tanto pon tao, e mowara ganeko alembung sabarundhel mahlok padha nyacak, nyepcep dhuwa` alam se bida. nyettong e dhalem dhadha. tanto gubangan dhadha bula, ngakek bato etem. pon kasorat dha-tandha alamat sorat bakal asat. ngakek bato etem aeng mata sokma ganeka areggi` lampat, keng banne bakal karat.

(aeng mata etem, menangka ancak larampadan, lolong se etarema raga. econthang dhalem rassa. pas tombu settong nyama. kasambat longlang kamennyor taresna).

sonar hidayati menangka somber loka
parcaja`a aeng mata bula, settong bakto ngalancar e dika!
: dina pon bula bai se loka, tape dika keya se ngolpa. tatongar cocong tatongkos

Nae`an, 14 Maret 2008

(puisi ini dumuat di Majalah Kidung edisi 16 2009)