are nonto maraji ba soka` ba larbat agandhu` perang
tandang arajut bajut tembang
tembang kakandha`an kasmaran se ta` amosem ojan ban panemoran
ngeka` lajir tandang sabulir, losso salose, nyo-lonyo leke
gagembangan pelle, mamole socce, pote abali pole
lir-bulir tandang ngajak bulan nyacak, atatembang e meyang
redhu, derres, kolot-loba, sapasang karang oreng kerrang kerreng amorba kerrong
e lorong lombung acella` dhapen langnge` biru se caltong gu-onggu
tembang tandang nalpe` e badan, agubang dhalem dhadha,
apattre ka bungkana ate
e bulan tendak kamardika`an Indonesia
dika se aroba pornama tera` ta` sabulla` binar mata are
nendaggagi mesem, nyeret bula alangngoy dhalem kabennengan mempe
dhari sabuter tandha se ngeyas kalaban sasokklat nun e cangkemma dika
dha` bula daddi tora se alabbuwa, baramma se ta` posangan
are nonto, dika ngajak nandang padha ban sampana daddali so gemmek
atandang, ngaraggagi tatembangan nenemoran se kasowet dhari palowet no` bithat
: paggun padhana gi` dullu, bula alecceng tacocco mathek se abungkel tajem sonar petodu; padhana sabban, bula agubek taman-taman kottha ka disa.
ngontallagi jala nyargebba minnya` jujung, colok togu se adhatengngan kata` mekol babang. tape bula ngebbul sajan mabu`, kasambu` solap sakeddhap kelap
mo-semmo ta` sangguba nampane dhammang salose bintaos sabibir conthong pepes perra mata
are nonto, baringbing bula kadhung maso` tartaran jaring
tatojjek masagi toros laro tabun tenggi
naleka dika ngajak nandang sambi nembang
dha-tandha aksara angka tengka kejung kasmaran
Labbuwan, 20 Maret 2008
(puisi ini dimuat di Majalah Kidung edisi 16 2009)
Tidak ada komentar:
Posting Komentar